Konsorcia magazeno de la Esperanta Civito
Karaj kleremuloj!
Ni invitas vin al la 14a Kultura Esperanto-Festivalo (KEF), kiu okazos de la 28a de julio ĝis la 3a de aŭgusto 2025 en La Chaux-de-Fonds, Svislando. Tiu ĉi unika evento estas vera festo de la esperanta kulturo, kiu kunigas diversajn artformojn kaj kreemajn aktivecojn. Pri la Festivalo KEF estas tradicia festivalo de originala E-kulturo, kiu ĝis 2009 okazis sen regula kadenco en nordiaj landoj. Ekde 2022, ĝi okazas ĉiujare en Svislando, kunorganizata de Kultura Centro Esperantista (KCE) kaj Studenta Esperanta Ligo (STELO). La festivalo proponas riĉan kaj varian programon, kiu inkluzivas muzikajn prezentojn, teatrajn spektaklojn, literaturajn eventojn, atelierojn pri pupteatro, kantado kaj tabloludoj, krome ekskursojn diversajn en la koro de Ĵuraso, natura mirindaĵo nepre vizitinda. Parto de la eventoj okazos kiel kutime en la Esperanto-Domo, kie gastis en agrabla etoso jam la tri pasintaj KEF, sed ni utiligos “La Turlutaine” por la teatraj prezentoj kaj la templon en Loklo por la koncertoj (fortepiana, recitala, korusa). Trafu ĉi tiun unikan ŝancon partopreni kulture riĉan eventon, karakterizitan interalie de valoraj gastronomiaj proponoj! Ĉu vi estas sperta esperantisto aŭ novulo en la komunumo, ni ofertas al vi la ŝancon ĝui altkvalitan kulturan programon kaj plibonigi vian esperanton en amika etoso dum la milda svisa somero. Ni atendas vin en Ĉaŭdefono por sperti kune dum KEF (28/07/2025 — 03/08/2025) la riĉecon kaj viglecon de la esperanta kulturo!
La tranoktejo kaj kongresejo estas la Helvetia domo, en Ĉaŭdefono, Chemin des Postiers 27, 2300.
La elekto de la ĉambro NE inkluzivas la manĝojn.
Prezoj (tage/persone) por 1-lita ĉambro– 45,- CHF
Prezoj (tage/persone) por 2-lita ĉambro– 34,- CHF
Turisma imposto (tage/persone)– 4,- CHF
Organizante la ĉambrojn, ni klopodas apartigi ronkulojn de neronkuloj.
Tri manĝoj tage/persone en la Helvetia domo kostas 40,- CHF.
E-civitanoj rajtas je rabato laŭ la Mutuala Rabata Sistemo. Se vi ne estas civitano, sed intencas peti la civitanecon, ni invitas vin informiĝi tra la retejo de Esperanta Civito kaj kompili la petskribon.
Via (mal)konsento rajtigas nin publikigi aŭ ne komunajn fotojn en kiuj vi aperas.
